أي مدير ادارة عليا أو صاحب عمل مش دوره يمسك ملفات صغيرة أو يتابع التفاصيل اليومية… الكبير دوره يرسم الاتجاه ويظبط البوصلة ويقيم ويقوم الأداء العام لادارته أو شركته .

لكن أحيانا الظروف بتجبرك تنزل تلمس الأرض وتتابع مستوي التنفيذ او الـ staff level .

وهنا تأتي الخطورة ...وتحصل مشكلتين شائعتين :

١- الأولي انه لما الكبير ينزل بتوقعات عالية بحكم خبرته والمستوي اللي بيبحث عنه وميلاقيش نص توقعاته دي بتتحقق ويشوف صورة تحسسه ان معاه فريق ضعيف ومش واخد باله ان فيه فرق خبرة رهيب !

٢- الثانية ان الفريق نفسه هو كمان طموحاته بتعلي علي ولا حاجة ويا اما يحس باحتراق وظيفي نتيجة فرق السرعات بينه وبين الكبير اللي بيدير أو بياخد مقلب في نفسه ويشوف انه جامد طالما بقي منه للادارة العليا مباشرة !

هنا بقي في شوية قواعد لازم تراعيها عشان متغلطش غلطة ناس كتير :

١- انت نازل للمتابعة مش للادارة : وجودك للتأكد ان السيستم ماشي وتلحق مشاكل قبل حدوثها مش عشان تمسك الادارة مكان المشرف اللي مش موجود

٢- خلي توقعاتك واقعية ومحدودة : ماتقارنش موظف Junior بمدير أو مشرف . سقف الأداء مختلف ومستوى النضج مختلف

٣- ما تطولش : وجودك لو استمر، الفريق هيعتبرك المدير المباشر ويبدأ يرفع توقعاته في المرتب والمعاملة وكأنه حصل على ترقية .

٤- انجز تعييناتك : حتي لو هتضم الناس دي تحت قيادة مدير ادارة قوي وترقي حد تحته من فريقه يساعد معاه في الاشراف علي فريق الجونيورز ...متدخلش في كل تفصيلة وتكسر تسلسل القيادة.

وخد بالك ياصديقي ان الكبير لما ينزل يدير… بيفقد جزء من قيمته الاستراتيجية وبيعمل لخبطة في توقعات الموظفين وعشان كده نزوله لازم يبقى بلمسة المتابعة… مش بغرض الإقامة .